Full City © Mynd Norska strandgæslan
Sjö menn eru enn um borð í olíuskipinu Full City sem strandaði fyrir utan Langesund í Þelamörk í Noregi í nótt. Í nótt var 16 af 23 manna áhöfn skipsins bjargað. Olía lekur úr skipinu og sjór inn í það. Á staðnum er 5-6 metra ölduhæð og vindur allt að 35 m/s, að sögn fréttavefjar Aftenposten.
Skipið mun hafa orðið vélarvana og strandað í kjölfarið um hálftíma eftir miðnætti að norskum tíma. Haft er eftir Ola Vaage, yfirmanni björgunaraðgerða á staðnum, að þeim líði ekki vel yfir því að vita af sjö mönnum sem vildu vera áfram um borð í skipinu.
Norska strandgæslan sendi tvö skip á strandstaðinn, einnig eru þar þrír dráttarbátar og björgunarþyrla til taks ef ástandið versnar. Mennirnir sem eru enn um borð eru allir við góða heilsu. Skipstjóri olíuskipsins segir að þeir séu um borð til að hindra olíuleka frá skipinu. Um borð voru 1.120 tonn af olíu.
Eitthvað af olíu hefur þegar lekið úr skipinu. Yfirmaður björgunaraðgerða sagði að reynt væri að hindra að olían sem lekur úr skipinu breiðist út. Á staðnum er megn olíuþefur allt að kílómetra frá strandstaðnum.
Full City er skráð í Panama og 167 metra langt. Öll áhöfnin er kínversk.
Heimild mbl.is
