Fyrnum Fyrningarleiðina

Vegna mikils áhuga, ekki síst á fastalandinu, hefur verið ákveðið að hafa beina útsendingu frá baráttufundinum sem haldinn verður í kvöld í Vestmannaeyjum hér á www.eyjafrettir.is. 

Fundurinn verður haldinn í samkomuhúsinu Höllinni og hefst klukkan 20:00, en húsið verður opnað kl. 19:30.

Boðað er til fundarins undir yfirskriftinni "Fyrnum fyrningarleiðina" gegn fyrningarleið í sjávarútvegi, útflutningsálagi á ísfiski, afnámi sjómannaafsláttar og aðför að landsbyggðinni.

Fundarboðendur eru Sjómannafélagið Jötunn, Skipstjóra- og stýrimannafélagið Verðandi, Félag vélstjóra- og málmtæknimanna, Godthaab í Nöf (fiskvinnsla án útgerðar), Útvegsbændafélag Vestmannaeyja, Útvegsbændafélagið Heimaey og Vestmannaeyjabær.

Sérstakur gestur fundarins verður Vilhjálmur Egilsson framkvæmdastjóri Samtaka atvinnulífsins, en einnig flytja ávörp Sigurður Sveinsson, varaformaður Sjómannafélagsins Jötuns, Eyþór Harðarson, varaformaður Útvegsbændafélags Vestmannaeyja, Friðrik Björgvinsson, umboðsmaður Félags vélstjóra-og málmtæknimanna og Elliði Vignisson, bæjarstjóri í Vestmannaeyjum.