Togarinn Athena brennur enn í Høgabóli í Skálafirði í Færeyjum. Vindátt er að breytast og hefur lögreglan beðið íbúa á Glyvrum og Lambareiði að fara að heiman vegna hættu á reykeitrun, að sögn Dimmalætting.

Færeyskar sjónvarpsmyndir sýna togarann skíðlogandi. Slökkviliðsstjórinn og yfirmaður lögreglu á staðnum mæla með því að togarinn verði dreginn í burtu.

Ekki hefur verið talið óhætt að senda slökkviliðsmenn um borð vegna sprengihættu, að því er kemur fram í frétt Sosialurin.  Mikil sprenging varð um borð í togaranum í morgu og óttast er að fleiri sprengingar geti orðið.

Færeysk sjónvarpsfrétt um brunann 

"Þetta er eins og með öll verkefni, það hjálpar allt til," segir Anton Benjamínsson, framkvæmdastjóri Slippsins Akureyri ehf. Slippurinn gekk á laugardag frá samningum við útgerðarfyrirtækið Onward Fishing, dótturfyrirtæki Samherja í Skotlandi, um smíði vinnslulínu í togarann Norma Mary sem er um þessar mundir í lengingu og vélarskiptum í Póllandi.

Segir Anton samningana skila fyrirtækinu um 50 milljónum króna, en um 145 starfsmenn vinna hjá Slippnum. Hafist verður handa við smíði vinnslulínunnar í dag og er áformað að ljúka verkinu í desembermánuði. Anton segir einnig færavindur hafa selst vel á sýningunni, eða fyrir um 25 milljónir króna, og þá sér í lagi hina nýju makrílvindu. "Þannig að við erum mjög ánægðir með sýninguna," segir Anton.

Lundey NS er á leið til hafnar með um 380 tonn af afla. Áætlað er að um 220 tonn af síld og 160 tonn af makríl séu í afla skipsins.

"Síldin og makríllinn eru á mjög mikilli ferð og til marks um það þá höfum við verið að veiða úr mjög góðum bletti sem við fundum við Glettinganesstotuna fyrir þremur dögum. Þarna voru gríðarlega góðar lóðningar og á þessum dögum eltum við torfuna um 100 sjómílna leið, fyrst í austur og síðan í suðaustur. Í gær toguðum við samfleytt 30 mílur í suðaustur og það var óhemjumikið að sjá. Í gærkvöldi var eins og allt gufaði upp. Fyrst héldum við að fiskurinn hefði skellt sér niður á 100 faðma dýpi eða þar um bil, sem ekki er óalgengt, en það var ekki reyndin," segir Stefán Geir Jónsson, sem er skipstjóri á Lundey NS í yfirstandandi veiðiferð, í samtali við vef HB Granda í dag.

Stefán Geir segir að lítill afli hafi fengist í nótt sem leið og þegar ákveðið var að halda til hafnar hafi Lundey verið um 50 mílur frá miðlínunni milli Íslands og Færeyja og í dag séu flest skipin að veiðum um 30 til 40 mílur frá miðlínunni. Veiðisvæðið er því nú í 120 mílna fjarlægð beint austur frá Norðfirði. Svo virðist hins vegar sem veiðin hafi svo til þurrkast upp í Hvalbakshallinu og á Þórsbankanum, þar sem frystitogarar og uppsjávarveiðiskip hafa verið að makrílveiðum undanfarnar vikur.