|
1661 Gullver Ns 12 i bræluskit á Austfjarðamiðum mynd þorgeir Baldursson
Ísfisktogarinn Gullver NS kom til löndunar á Seyðisfirði á þrijudaginn. Afli skipsins var 115 tonn, mest þorskur og ýsa.
Þórhallur Jónsson skipstjóri segir að túrinn hafi byrjað illa en endað vel. “Við reyndum ýmislegt í þessari veiðiferð með misjöfnum árangri.
Við byrjuðum á að fara suður á Stokksnesgrunn að leita að ufsa og karfa en þar var hreint út sagt ekkert að hafa.
Síðan var farið á Lónsbugt og Lónsdýpi og einnig á Papagrunn og það var nánast sama sagan. Þetta leiddi til þess að fyrsti eini og hálfi sólarhringurinn skilaði afskaplega litlu.
Þá tókum við hol á Örvæntingarhorni og þar fékkst þorskur en hann var ekki góður og því var ekki lengur verið þar.
Að þessu loknu var haldið á Skrúðsgrunn og þar fengum við ýsu. Leiðin lá síðan á Tangaflakið þar sem stutt var stoppað áður en farið var í Héraðsflóann og á Glettinganesflakið.
Þar var síðan restað í ýsu og þorski. Það var kaldafýla allan túrinn en engin ástæða til að kvarta mikið yfir veðrinu.
Eins og sést á framansögðu var ýmislegt reynt í þessum túr og þegar upp var staðið var hann bara ásættanlegur og við komum með fullt skip að landi,” segir Þórhallur.
 |
| Strákarnir á Gullver Ns 12 taka trollið mynd þorgeir Baldursson |
|
