Af þessu tilefni báðum við Annakay Crawford að segja okkur frá sjálfri sér, af hverju hún valdi að starfa á sviði fiskveiðistjórnunar og hvað hún vonast til að fá út úr þátttöku sinni í GRÓ-náminu. Einnig er áhugavert að skoða hvað þessar tvær eyjar - Ísland og Jamaíka - eiga sameiginlegt og hvað helst aðgreinir þær á sviði fiskveiðistjórnunar.

„Ég ólst upp í litlu samfélagi sem heitir Waterford í St. Catherine sýslu á Jamaíka. Strangt og óvægið uppeldi einkenndi æsku mína og hafði mikil áhrif á þá manneskju sem ég er í dag. Ég á eina eldri systur og tvo yngri bræður og er sjálf einstæð móðir með tvö börn, Jaylu (17 ára) og Odane (13 ára). Ég vona innilega að börnin mín fái að njóta þeirrar menntunar sem þau óska sér í framtíðinni og allt bendir reyndar til þess að svo verði, þau eru bæði góðir námsmenn.

Menntun hefur alltaf skipt mig mjög miklu máli og í raun upplifði ég að hún væri eina leiðin fyrir mig að breyta mínum aðstæðum. Ég er með B.Sc.-gráðu í opinberri stjórnsýslu og er um það bil að ljúka meistaragráðu í alþjóðlegri stefnumótun og þróunarstjórnun. Meistaraverkefnið mitt fjallar um stjórnun fiskveiðigagna í Karíbahafinu, sem ég ber saman við Ísland og Noreg.

Til að efla fagþekkingu mína hef ég einnig lokið námskeiðum s.s. í verkefnastjórnun, stefnumótun, stjórnendafræðum, stjórnsýslu og viðskiptaritun hjá Management Institute for National Development, helstu mennta- og þjálfunarstofnun ríkisins á Jamaíku.“

Fiskveiðar skipta miklu fyrir þróun Jamaíka

Annakay segir að áhugi hennar á opinberri stjórnsýslu hafi kviknað snemma. Hún fékk ung starf í ráðuneyti atvinnu og félagsmála og undir handleiðslu yfirmanns síns, frú Kennedy, fékk hún mikilvægan innblástur. „Þar kynntist ég opinberri stjórnsýslu og ákvað að leggja stund á fagið og stefni á að fara síðar í doktorsnám og einblína á málefni fiskveiðistjórnunar.“

Áhugi hennar á fiskveiðum kviknaði árið 2018 með breytti skipan fiskveiðistjórnunar í Jamaíku. „Sem aðstoðarmaður forstjóra kynntist ég stefnumótun og ákvörðunum innan stjórnsýslunnar. Þá áttaði ég mig á því hve gríðarlega mikilvægar fiskveiðar eru sem lífsviðurværi strandbúa, fyrir fæðuöryggi og efnahagsþróunina í landinu.“

Í háskólanámi sínu beindi hún markvisst sjónum að verkefnum sem tengdust fiskveiðum: rannsóknaráætlunum, stafrænum breytingum, tækni og nýsköpun, stjórnsýslu, lögum um strandbyggðir og fleiru.

„Þessi verkefni mótuðu áhuga minn og styrktu þá sannfæringu að framtíð mín væri í málefnum fiskveiðistjórnunar og opinberri stjórnsýslu.“

Að vera kona í málefnum fiskveiðistjórnunar

Annakay viðurkennir að starfsvettvangurinn hafi verið krefjandi fyrir sig sem konu i karlaumhverfi. Hún byrjaði ferilinn sem ritari en hefur unnið sig upp í ábyrgðarstöður. „Ég hef verið heppin að vinna með leiðtogum sem hafa stutt mig og treyst mér.“

Vegferðin hefur ekki alltaf verið auðveld að mati Annakay en hún segir að skuldbinding hennar við eflingu fiskveiðistjórnunar á Jamaíka og sem og að styðja samfélög sem reiða sig á hana, sé það sem knýr hana áfram.

20. þing fiskveiðinefndar  Miðvestur-Atlantshafsins.

Hlutverk Blue Justice Initiative var að festa í sessi samræmda lands- og svæðisbundna stuðningsstarfsemi til að takast á við fiskveiðatengda glæpastarfsemi á Jamaíka og víðar.

Samráð við hagsmunaaðila og kynning á stafrænum vettvangi.