Isfisktogari keyrir á Steikingarfeiti

Ávinningurinn er meðal annars sá að það þarf ekki að kaupa eldsneyti erlendis frá. Það sparar erlendan gjaldeyri. Þá dregur notkun lífdíselsins úr losun gróðurhúsalofttegunda um 80% miðað við notkun venjulegrar díselolíu," segir Kristinn F. Sigurharðarson, framkvæmdastjóri Orkeyjar, um þau tímamót að Björgúlfur EA-312 notar orðið íslenska lífdíselolíu.

Verksmiðja Orkeyjar er á Akureyri og segir Kristinn vel hægt að auka framleiðsluna verulega.

"Orkey framleiðir 300 tonn á ári miðað við þá keyrslu sem við erum með í dag. Við getum aukið framleiðsluna með tiltölulega litlum tilkostnaði upp í 2.500 tonn. Íslenski flotinn notar 300.000 tonn. Þetta er því lítið brot af heildinni. En þetta gefur okkur möguleika á því að huga að miklu fleiri hráefnismöguleikum sem eru fyrir hendi og er ekki verið að nýta í dag.

Nú notum við dýrafitu og steikingarfitu í framleiðsluna. Það eru miklu fleiri möguleikar sem við gætum verið að nýta. Það er von okkar að þetta ryðji brautina fyrir frekari vinnslu."

Einsdæmi í heiminum

Fram kemur í tilkynningu frá fyrirtækinu að það sé "einsdæmi í heiminum að úrgangi sé breitt í orku sem síðan er notuð á fiskiskip".

Hluthafar Orkeyjar eru sextán talsins. Þeir eru Aura Mare, N1, Samherji, Víkey, Rafeyri, Tækifæri, Arngrímur Jóhannsson, Efnamóttakan, Hafnarsamlag Norðurlands, Mannvit, Norðurorka, Brim, HB Grandi, Höldur, Ágúst Torfi Hauksson og LÍÚ.