Aðstæður með ólíkindum erfiðar, segir skipstjórinn á Lundey NS

,,Það er víst engu logið um að þetta hafsvæði suður af Færeyjum er sannkallað veðravíti og það er mikið um frátafir á veiðum vegna þess. Í gær urðum við að halda sjó í hálfan sólarhring í norðanbrælu og haugasjó og það var ekki fyrr en í morgun að það var hægt að kasta aftur. Og það lítur ekki út fyrir mikinn frið því að næsta lægð er á leiðinni og nú er spáð sunnanbrælu."

Þetta sagði Stefán Geir Jónsson, fyrsti stýrimaður og afleysingaskipstjóri á Lundey NS, en er rætt var við hann á vef HB Granda  nú síðdegis var hann með skipið að veiðum um 70 mílur suður af Færeyjum. Búið var að hífa eftir fyrsta hol dagsins og var áætlaður afli um 400 tonn. Þar með er aflinn í veiðiferðinni orðinn rúmlega 1.000 tonn.  Sagðist Stefán Geir vonast til þess að ná nægilegu aflamagn í síðara holi dagsins til að hægt yrði að halda til Vopnafjarðar með ásættanlegan afla áður en næsta stórviðri skylli á.

,,Það er eiginlega með ólíkindum hvað aðstæður hafa verið erfiðar. Um daginn var ekki um annað að ræða en að koma skipunum í var við Færeyjar enda var þá gríðarmikil ölduhæð á veiðisvæðinu. Sjólagið var skárra í gærkvöldi en þá fór vindhraðinn í 20 m/s og þýðingarlaust að vera að veiðum."

Að sögn Stefáns Geirs er Lundey nú í síðasta hreina kolmunnaveiðitúr ársins. Faxi RE er á leiðinni á miðin og er væntanlegur þangað í fyrramálið. Faxi á eftir eina veiðiferð og hið sama má segja um Ingunni AK. Verið er að landa úr skipinu á Vopnafirði og standa vonir til að það geti látið úr höfn strax í nótt. Með aflanum úr þessum þremur síðustu veiðiferðum HB Granda skipanna má reikna með því að heildarkolmunnaaflinn á vertíðinni verði um 21.000 tonn. Þá er lítið óveitt af kvótanum en eftirstöðvarnar verða nýttar fyrir kolmunna sem meðafla á síld- og makrílveiðum í sumar.

Veiðar á úthafsrækju byggja á sóknarstýringu og hefur verið ákveðið að veiðarnar verði stöðvaðar eigi síðar en 1. júlí. Þessi ákvörðun er tekin í ljósi þróunar veiða á yfirstandandi fiskveiðiári og til að tryggja ákveðinn fyrirsjáanleika. Þá má búast við að stjórn  veiða á úthafsrækju komi til endurskoðunar fyrir upphaf næsta fiskveiðiárs.

Þetta kemur fram í frétt á vef atvinnu- og nýsköpunarráðuneytisins.

Í júlí 2010 var tekin ákvörðun um að frá og með fiskveiðiárinu 2010/2011 yrði ekki gefinn út heildarafli, og þar með aflamark, vegna veiða á úthafsrækju. Í fréttatilkynningu ráðuneytisins nr. 46/2012 var gerð grein fyrir forsendum þeirrar ákvörðunar.

Þar er rakið að frá fiskveiðiárinu 2000/2001 hafi ekki verið aflað upp í útgefið aflamark. Þá var einnig vísað til skýrslu starfshóps ráðuneytisins um veiðar á úthafsrækju frá 2010, þar sem ljáð var máls á því að tekin yrði upp sóknarstýring í stað aflamarksstýringar við stjórn veiða á stofninum, í því skyni að hvetja til betri nýtingar.

Við upphaf fiskveiðiáranna 2011/2012 og 2012/2013 var ákveðið að framlengja þessari ákvörðun, þ.e. veiðar á úthafsrækju hafa að meginreglu verið öllum frjálsar þó með hliðsjón af ráðgjöf, segir í frétt ráðuneytisins.