Gríska skipið Titika með heimahöfn í Porto Rico strandaði í Keflavíkurhöfn í sinni fyrstu ferð sem vöruflutningaskip og undir þessu nafni og í eigu nýrra eiganda. Orsök strandsins voru þær að er skipið var að fara frá hafnargarðinum í Keflavík bilaði vélin og rak skipið upp í kletta fyrir neðan Fiskiðjuna sálugu þann 1. nóv. 1955. Skipið sem var smíðað sem farþegaskip í Washington í Bandaríkjunum 1929 og mældist 717 tonn kom hingað til að taka skreið. Keyptu heimamenn í Keflavík og Njarðvík skipið á strandstað fyrir 60-70 þúsund kr. og náðu því út 24. apríl 1956.
Skipið var þétt og lagfært og komið á flot og farið með það í Njarðvík og gert við það þar og dregið til Reykjavík þar sem fór fram meiri viðgerð á skipinu til að koma því til Hollands þar sem það fór í brotajárn. Notuðu þeir ferðina til að flytja út kopar og aðra málma í tunnum til sölu erlendis og með því gátu þeir náð hagnaði út úr dæminu, en annars stóð allt á sléttu. Valur Línberg sendi okkur myndina en það var tengdafaðir hans Ragnar Sigurðsson sem tók hana og sendum við kærar þakkir fyrir.
Titika á Strandstað í Keflavík © mynd Ragnar Sigurðsson.
