Grímsnesið strandaði og dreginn til Eyja

Varðskip Landhelgisgæslunnar Týr tók nú eftir hádegi netabátinn Grímsnes GK-555 í tog þar sem drepist hefur á aðalvél bátsins. Sjókælir bátsins skaddaðist þegar hann strandaði á sandrifi 3,2 sjómílur norðaustur af Skarðsfjöruvita á Meðallandssandi.

Gripið var til þess ráðs að kæla aðalvél bátsins með ferskvatni, sem var um borð. Hafa vatnsbirgðir bátsins nú klárast og var því talið nauðsynlegt að varðskipið taki bátinn í tog. Verður Grímsnes GK-555 dregið til hafnar í Vestmannaeyjum og ef skipin hefðu komið  fyrir myrkur til Eyja hefðum við getað birt myndir af því frá okkar öfluga félaga Tryggva Sigurðssyni. En síðan kom í ljós að veður hamlaði því að skipin kæmu þangað og er jafnvel talin sólarhringur í það. Um þá seinkun sagði eftirfarandi á mbl.is nú síðdegis:

Búið að koma vélinni í gang

Ferð Varðskipsins Týs sem er með dragnótarbátinn Grímsnes GK-555 í togi á leið til Vestmannaeyja gengur fremur hægt. Vestan strekkingur er á móti og hafa skipin farið um tvær sjómílur á klukkustund, að sögn Stjórnstöðvar Landhelgisgæslunnar. Samkvæmt því gætu skipin komið til Eyja eftir tæpan sólarhring.

Búið er að koma aðalvél Grímsness GK í gang og getur báturinn nú siglt á hægri ferð fyrir eigin vélarafli. Til greina kemur að taugin verði leyst á milli skipanna og að varðskipið fylgi bátnum til hafnar. Það hefur þó ekki verið ákveðið. Dráttartaugin slitnaði fyrr í dag og gekk greiðlega að tengja hana aftur.

                                 Varðskipið Týr © mynd Emil Páll
.