|
17.02.2009
Risa saltskip í höfninni
Næst stærsta skip sem nokkru sinni hefur siglt inn í Grindavíkurhöfn kom þangað í gær. Það heitir Wilson Skaw og er 113 metra langt, 15 metra breitt og með 7 metra djúpristu full hlaðið. Skipið kom með 3800 tonna saltfarm fyrir Saltkaup en birgðarstöðvar þess á Suðurnesjum eru í Hópsnesi.
Saltskipið kom frá Bahamas og fer þangað beint aftur að ná í meira salt fyrir Íslendinga. Um tvo sólarhringa tekur að landa úr skipinu sem kemur hingað á vegum Nesskipa. Skipið hefur ekki komið hingað áður.
Stærsta skip sem komið hefur í Grindavíkurhöfn var 4700 tonn, 115 metra langt og 19 metrar á breidd. HEIMILID: grindavik.is |
