Nýr geisladiskur Roðlaust og Beinlaust

                          Kleifarberg ÓF 2  © mynd þorgeir Baldursson 
"Þung er nú báran ..." er heitið á nýútkomnum 17 laga geisladiski með hljómsveitinni Roðlaust og beinlaust í Ólafsfirði, en útgefandi er Mogomusic ehf. Þetta er fjórði geisladiskur hljómsveitarinnar í fullri lengd og mun allur ágóði af sölu hans renna til stuðnings Slysavarnaskóla sjómanna

Áður hefur Roðlaust og beinlaust gefið úr "Bráðabrigðalög" (2001), "Brælublús" (2003) og "Sjómannssöngvar" (2006), sem allir hafa að geyma lög og texta tengda sjómennsku og sjósókn. Það sama á við um nýja diskinn "Þung er nú báran ...". Diskurinn er seldur í símasölu.

Hljómsveitin Roðlaust og beinlaust hefur á undanförnum árum verið einn stærsti stuðningsaðili Slysavarnaskóla sjómanna. Hljómsveitin, sem að hluta til er skipuð sjómönnum af frystitogaranum Kleifabergi ÓF-2, ákvað árið 2003 að láta allan ágóða af sölu disksins "Brælublús" renna óskipt til Slysavarnaskóla sjómanna til eflingar á öryggisfræðslu sjómanna í landinu.

Ágóðinn af sölunni, sem var 1,4 milljónir, voru notaðar til kaupa á endurlífgunarbrúðum til nota við verklega kennslu í endurlífgun.

Á sjómannadaginn árið 2004 spilaði hljómsveitin lög sín um borð í skólaskipinu Sæbjörgu á siglingu þess hátíðargesti í tilefni dagsins við feikigóðar undirtektir.

Við útgáfu á disknum "Sjómannssöngvar" ákvað hljómsveitin enn á ný að láta ágóða sölunnar, rúmar tvær milljónir króna, renna til Slysavarnaskóla sjómanna. Var sú gjöf nýtt meðal annars til kaupa á hjartastuðtækjum til nota við kennslu á námskeiðum skólans.

Hefur þessi mikilvægi stuðningur hljómsveitarinnar Roðlaust og beinlaust sannarlega komið Slysavarnaskólanum og sjómannastéttinni að góðum og nytsamlegum notum í viðleitninni að efla þekkingu og hæfni sjómanna í öryggis- og björgunarmálum.Heimild Dagur.net