Í gær afhentu Trefjar ehf. nýjan Cleopatra 31 bát sem skráður er á Rifi. Reiknað er með að hann verði á handfæraveiðum nú sumar og líklega á línu yfir vetrartímann, samkvæmt frétt frá Trefjum.
Hinn nýi bátur frá Trefjum Særún SH 86 © mynd Trefjar ehf., í júní 2009
Útgerðarfélagið Hlíðarfoss ehf. á Rifi er eigandi bátsins. Að útgerðinni stendur Friðbjörn Ásbjörnsson. Nýi báturinn hefur hlotið nafnið Særún SH 86 og er af gerðinni Cleopatra 31 í nýrri útgáfu. Hann er 8,5 brúttótonn og er í krókaaflamarkskerfinu. Báturinn er útbúinn fjórum DNG handfærarúllum og í honum er vökvakerfi tilbúið til línuveiða. Aðalvél bátsins er af gerðinni Isuzu 6HE1TCX 370hp tengd ZF gír. Siglingatækin eru af gerðinni JRC og Raymarine frá Sónar. Öryggisbúnaður bátsins kemur frá Viking. Rými er fyrir 12-14 stk. 380 lítra kör í lest. Svefnpláss er fyrir 2-3 í lúkar auk eldunaraðstöðu með eldavél og örbylgjuofni. Setkrókur er í lúkar og stólar fyrir skipstjóra og háseta í brú.
Báturinn er þriðji í röðinni af fjórum sem Trefjar hafa smíðað af þessari gerð nú í vor. Sá fyrsti Ólafur HF- 51 er nú í sýningarferð. Hann er nú á ferð milli hafna í Færeyjum eftir siglingu frá Hornafirði.
