07.08.2009 23:33

Álsey Ve dregur Júpiter til Akureyrar eftir óhapp á miðunum

2772. Álsey VE 2 © mynd Emil Páll

Júpiter ÞH lenti í morgun í óhappi úti á miðunum og er Álsey VE 2 með hann í togi og eru skipin væntanleg til Akureyrar nú upp úr miðnætti. Um óhappið skrifaði Þorbjörn Víglundsson þetta á síðu sinni, en hann er á Álseynni:
,,Það leiðinlega óhapp henti strákana á Júpiter ÞH þegar þeir voru að taka trollið að annar leiðarinn fór í skrúfuna hjá þeim. Við það varð gríðarlegt högg og var eins og að sprenging hefði orðið í skipinu. Í stuttu máli sagt þá brotnaði gírinn í mask og við það gekk skrúfuöxullinn aftur um 20 sentimetra. Júpiter ÞH er af þessum sökum gjörsamlega úr leik.
Júpiter ÞH náði þó að koma pokanum á síðuna og var aflanum dælt yfir í okkur og gekk það ágætlega. Eftir að dælingu lauk var farið í að græja skipin undir drátt í land og erum við með stefnuna á Akureyri núna á 8 sml. ferð. Það eru einar 150 sml. til Akureyrar og er áætlað að verða þar um tvö í nótt.
Þetta er mikið tjón sem hefur orðið á gírnum og segja vélameistarar hér um borð að gírinn sé ónýtur. Skipið þarf að fara í slipp vegna þessa en skrúfan er er gengin aftur og liggur sennilega utan í stýrinu".

Að sögn Þorgeirs Baldurssonar sem er um borð í Sólbaki á leið út frá Akureyri mættust skipin rétt áðan, en Álsey VE 2 sem Þorbjörn Víglundsson er skipverji á, dregur Júpiter og átti Þorgeir von á að Álsey og Júpiter myndu komu um kl. 00.30 til Akureyrar. Þar sem dimmt var orðið er skipin mættust í Eyjafirði, látum við gamlar myndir af Júpiter og Álsey nægja að þessu sinni, annars hefðu nýjar myndir verið teknar og settar inn á síðuna.

2643. Júpiter ÞH 363 © mynd Þorgeir Baldursson