Niðurstöður togararalls vonbrigði

Hafrannsóknastofnunin birti helstu niðurstöður úr stofnmælingu botnfiska á Íslandsmiðum (togararallinu) í dag. Fram kemur að bráðabirgðastofnmat stofnunarinnar, sem byggir á aldursgreindum vísitölum og aldursgreindum afla, bendi til að stærð veiðistofns þorsks í ársbyrjun 2010 hafi verið nálægt því sem stofnunin bjóst við þegar stofnmat var gert á síðasta ári, eða rúm 720 þúsund tonn.

Friðrik J. Arngrímsson framkvæmdastjóri LÍÚ segir að þessi niðurstaða sé vonbrigði og ef þetta gangi eftir þá verði aflamark í þorski lægra á næsta fiskveiðiári en það er nú samkvæmt þeirri aflareglu sem ríkisstjórnin samþykkti í fyrra.

Nú liggur fyrir Alþingi frumvarp um að stórauka svokallaðar strandveiðar og að vegna þeirra verði dregin á milli 5 og 6 þúsund tonn frá afla- og krókaaflamarki í þorski á næsta fiskveiðiári. Friðrik segir að gangi þetta eftir þá verði einungis rúm 140 þúsund tonn til skiptanna á næsta fiskveiðiðári og af því fari væntanlega drjúgur hluti til að mismuna útgerðum með ýmsu móti. Hann segir það undarlega ráðstöfun að skerða enn aflaheimildir þeirra, sem hafa tekið á sig verulegar skerðingar á undanförnum árum til að byggja upp þorskstofninn og færa þær öðrum.

Friðrik spyr hvað sé eftirsóknarvert við að aðrir aðilar en þeir sem nú stunda fiskveiðar geri það.  "Hvað er eftirsóknarvert við að bankaútibússtjóri, starfsmaður vátryggingafélags eða fasteignasali, með fullri virðingu fyrir þeim öllum, stundi frekar fiskveiðar en þeir sem hafa þær að atvinnu? Af hverju vill ríkisstjórnin að atvinnumennirnir fari á atvinnuleysisbætur á meðan hundruð báta, sem engin þörf er fyrir, verða gerðir út með tilheyrandi kostnaði?" spyr framkvæmdastjóri LÍÚ.

Nánar má lesa um vorrallið hér