Hásetinn með ljósmyndadelluna!

Sóknarfæri í sjávarútveg - feb. 2011

Þorgeir Baldursson, með myndavélina og hljóðnemann fyrir framan togarann Sólbak. "Fer aldrei á sjó án myndavélarinnar," segir hann.

 Þorgeir Baldursson á Akureyri fékk ljósmyndaáhuga um fermingu og hún ágerist með árunum:

Hásetinn með ljósmyndadelluna!

 "Blessaður vertu - ég hef ekki hugmynd um hvað ég á margar myndir. Ég veit bara að þær eru margar, bæði utan af sjó og úr landi," segir Þorgeir Baldursson, háseti á Akureyrartogaranum Sólbak EA 1 en hann er einn af þeim sjómönnum sem hefur ljósmyndadellu að tómstundagamni á sjónum. Og raunar má segja að í tilfelli Þorgeirs sé ljósmyndunin talsvert meira en hobbý núorðið því til hans leita margir um myndir af skipum og sjómennsku, auk þess sem hann tekur myndir árið um kring fyrir Íslenska sjómannaalmanakið.

"Ljósmyndadellan byrjaði um fermingu og þegar ég byrjaði í sjómennskunni þá fór ég að taka vélina með mér á sjóinn. Eftir því sem árin líða þá verður þetta sífellt ágengara tómstundagaman sem ég get bæði stundað úti á sjó og líka í fríum í landi," segir Þorgeir en hann fer víða til að taka myndir, sækir alls kyns viðburði og oft má sjá myndir frá honum í Morgunblaðinu og fleiri fjölmiðlum. Í dag er hann kominn með stafræna öfluga Canon myndavél sem jafnframt getur tekið hágæða hreyfimyndir og þegar svo ber undir tekur Þorgeir viðtöl fyrir mbl.is ef eitthvað áhugavert verður á vegi hans.

 Canoninn alltaf við hendina

"Ég fer aldrei á sjó öðruvísi en með vélina með mér, enda er ég alltaf á útkíkkinu eftir skipum til að mynda fyrir sjómannaalmanakið. Ég held skipulagða skrá yfir skipamyndirnar eftir skipaskrárnúmerum og með því kerfi er hægt að halda til haga ferli skipa þó þau breyti um nöfn og einkennisnúmer. Og það er mikið um slíkar eigendabreytingar og þá er nauðsynlegt að vera stöðugt að mynda til að vera með sem nýjastar myndir af skipunum hverju sinni," segir Þorgeir en hann hefur alltaf haft mikinn áhuga á skipum og sjávarútvegi og getur rakið sögu margra skipa í flotanum.

"Mér finnst flotinn okkar orðinn mjög gamall og sést best á því að skipið sem ég er á í dag er orðið 40 ára. Þannig er um mörg skip í fiskiskipaflotanum og fyrr en síðar hlýtur að koma að miklum breytingum á skipastólnum," segir Þorgeir en hann hefur um nokkurra ára skeið haldið úti vefsíðu á slóðinni www.123.is/thorgeirbald þar sem hann er með ljósmyndasafn og birtir fréttir og alls kyns fróðleik úr sjávarútvegi.

 Ljósmyndunin og sjómennskan fara vel saman

"Ljósmyndunin og sjómennskan fara ágætlega saman," segir Þorgeir en hann byrjaði á sjónum árið 1980 í heimabæ sínum á Húsavík. Fyrsti báturinn var Vinur ÞH 73, síðan lá leiðin meðal annars á Guðbjörgu ÞH 355 og í framhaldinu var Þorgeir um margra ára skeið á línu- og netabátnum Alberti Ólafssyni í Keflavík. Þá lá leiðin aftur norður en þá til Akureyrar þar sem hann hefur verið síðan á togurum ÚA og síðar Brims. Inn í milli fór hann meðal annars á Eyborgina og þar á Flæmska hattinn og var einnig um tíma á Dalborginni hjá Snorra Snorrasyni, skipstjóra.

"Í dag ræ ég 3 túra og einn í frí og líkar þetta fyrirkomulag mjög vel. Þetta eru stuttir túrar á Sólbak, við fiskum nánast eingöngu þorsk hér úti fyrir Norðurlandi  á Vestfjarðamiðum og austur á Digranesflak. Það kemur fyrir að ég taki ekki mynd í túr en það er sjaldgæft," segir Þorgeir og glottir! Enda er alltaf hægt að finna skip til að mynda eða skemmtileg sjónarhorn á lífið um borð.