|
Makrill krapaður um borð i Isfisktogara © þorgeir
Fiskistofa auglýsir eftir umsóknum um heimild til veiða á makríl í grænlenskri lögsögu skv. reglugerð 620/2012. Heimilt er að landa allt að 12.000 tonnum af makríl sem þar hefur verið veiddur. Viðkomandi skip skulu hafa útgefna heimild Fiskistofu.
ATH: Þessi tilkynning var uppfærð 30. júlí þar sem atvinnuvega- og nýsköpunarráðuneytið ákvað þann dag að auka löndunarheimildina sem fram kemur í 5. lið hér að neðan úr 4 þúsund í 12 þúsund tonn. Þetta hefur verið tilkynnt þeim skipum sem fengið hafa heimild Fiskistofu til löndunar á makríl af Grænlandsmiðum.
Eftirfarandi skilyrði gilda um þessar veiðar og landanir:
- Heimildin tekur eingöngu til skráðra skipa á Íslandi og eingöngu til afla sem ætlaður er til manneldis, hvort sem hann er unninn um borð í vinnsluskipi eða landað í íslenskri höfn til manneldisvinnslu.
- Íslensk skip skulu sýna fram á að þau hafi leyfi til veiða í grænlenskri lögsögu og hafi staðfest samkomulag við grænlenska útgerð um aflaheimildir.
- Halda skal makrílafla sem veiðist í grænlenskri lögsögu aðskildum frá makríl sem veiðist í íslenskri lögsögu og gera skal jafnframt sérstaka skýrslu um hann. Skipstjóri skal, svo fljótt sem verða má eftir að veiðum lýkur, en eigi síðar en 4 klukkustundum eftir að komið er til hafnar, senda Fiskistofu skýrslu um áætlaðan makrílafla í viðkomandi veiðiferð á því formi sem Fiskistofa ákveður. Í skýrslunni skal í það minnsta koma fram afli skipsins sundurliðaður eftir tegundum innan fiskveiðilandhelgi Grænlands.
- Um tilkynningar að öðru leyti gilda ákvæði reglugerðar 285/2014 þar sem það á við. Um tilkynningar til Grænlands vegna veiða innan grænlensku lögsögunnar fer samkvæmt reglum þarlendra stjórnvalda.
- Heimild þessi fellur niður eftir að 12.000 tonnum er náð.
|
