05.01.2017 21:58

Róður með Gullhólma SH 201

Viðtal Við Sigga skipstjóra i Jólablaði fiskifretta GUGU@fiskifrettir.is

Myndir Þorgeir Baldursson

Það hefur verið fín línuveiði hjá Gullhólma SH það sem af er þessu fiskveiðiári. Báturinn er gerður út af Agustsson ehf. á Stykkishólmi en hefur verið við veiðar allt frá því í ágúst fyrir norðan land. Rætt var við Sigurð A. Þórarinsson skipstjóra um aflabrögðin og reynsluna af nýjum Gullhólma og Þorgeir Baldursson fór í róður og skráði túrinn í myndum.

Gullhólmi SH 201 leysti samnefndan línubát Agustsson ehf. af hólmi í október 2015. Gamli Gullhólmi var of stór miðað við þær heimildir sem útgerðin hafði. Með því skipta úr aflamarki í krókaaflamark náði fyrirtækið að auka við sig heimildir vegna verðmismunar milli kerfanna. Auk þess er reksturinn á nýjum Gullhólma umtalsvert hagkvæmari en á þeim eldri. Gamli Gullhólmi var seldur GPG á Húsavík og heitir núna Hörður Björnsson ÞH og er gerður út á línu frá Raufarhöfn.

1100 tonn á fyrsta árinu

Báturinn er um 30 brúttótonn að stærð og er smíðaður inn í krókaaflamarkskerfið. Alveg frá því hann var tekinn í notkun hefur hann fiskað með miklum ágætum. Allt fiskveiðiárið skilaði hann um 1.100 tonnum af slægðu í land, sem er um 1.310 af fisk upp úr sjó. Það sem af er hefur Gullhólmi þegar fengið um 400 tonn af slægðu þannig að gangurinn hefur verið góður þessa fyrstu þrjá mánuði fiskveiðiársins. Allur þorskurinn fer til saltfiskvinnslu hjá Agustsson ehf. á Stykkishólmi en aðrar tegundir fara á fiskmarkað.

ódrjúgur Nóvember

Sigurður skipstjóri sagði að þó hefði heldur dregið úr veiðinni eftir sjómannaverkfallið en um leið bærust fregnir af því að aflabrögð hefðu glæðst fyrir austan land. Til stóð að halda suður á bóginn fyrir jól og reyna fyrir sér í Breiðafirðinum og búa sig svo undir hávetrarvertíð í Faxaflóanum.

"Það var allt í lagi með þennan túr núna. Við vorum með einhver 7 tonn af slægðu. Við lögðum bara eina lögn núna, um 19.000 króka því það var farið að kula. Við vorum hérna úti af Siglufirði og höfum verið í allt haust hérna í Skagafjarðardýpinu, eða alveg frá því í águst. Þetta er búið að vera fín veiði í allt haust en þó aðeins tregara núna eftir sjómannaverkfall. Við lentum líka í smábilun og þurftum að fara í slipp í smátíma. Svo var líka bræla strax eftir verkfallið í fjóra eða fimm daga. Nóvembermánuðurinn varð því dálítið ódrjúgur," segir Sigurður.

Lygilega gott sjóskip

Hann segir fiskinn mun blandaðri núna en í fyrra. Mun meira er núna af litlum fiski sem bendi til þess að nýir árgangar séu að skila sér á veiðislóð. Það sé bara hughreystandi að sjá líka minni fiskinn.

Sigurður var stýrimaður á gamla Gullhólma og hefur nú verið skipstjóri á nýja bátnum í um fjórtán mánuði. Hann segir mjög góða reynslu af bátnum og allt gengið samkvæmt áætlun. Ekki sé samt sótt alveg jafndjúpt og stímið sé yfirleitt um 4-5 tímar frá Siglufirði.

"Gullhólmi er lygilega gott sjóskip sem kom eiginlega á óvart því hann er svo hár í sjónum. Hann fer vel með okkur og við höldum bara til í bátnum sem er okkar annað heimili."