Kallinn i Brúnni Eirikur Sigurðsson á Reval Viking

Gott viðtal við magnaðan fiskimann i sjómannablaðinu Vikingi

Hægt er að að senda upplýsingar til ritstjórans  jóns Hjaltassonar á Jonhjalta@simnet.is 

ef að áhugi er að fá blaðið i áskrift eða koma efni til blaðsins 

 

Eirikur Sigurðsson skipst á Reval Viking  i brúnni mynd þorgeir Baldursson

Reval Viking  EK 1202 mynd þorgeir Baldursson 2013       Skipverjar á Reval Viking ásamt Eiriki Skipstjóra mynd þorgeir Baldursson

 

Eiríkur Sigurðsson

 

Nafn og hvenær fæddur og hvar?

Eiríkur Sigurðsson, fæddur á Húsavík 1961

 

Hversu gamall  varstu þegar þú byrjaðir á sjó og hve gamall varstu þegar þú fórst í Stýrimannaskólann?

Ég var barn að aldri þegar ég byrjaði á sjó á trillum frá Húsavík en fór í Stýrimannaskólann strax þegar ég hafði aldur til eða 17 ára.

 

Hvaða ár laukstu skipstjórnarprófi?

Það var vorið 1982.    

 

Á hvaða skipum hefur þú verið og hvert þeirra er eftirminnilegast?

Ég hef verið á eftirfarandi skipum í nokkurn veginn réttri tímaröð: Vinur ÞH, Gísli Árni RE, Sigþór ÞH, Kolbeinsey ÞH, Skálaberg ÞH, Fengur RE, Hilmir II SU, Árni á Bakka ÞH, Örn KE, Jón Finnsson RE, Hágangur II, Eyborg EA, Húsvíkingur ÞH, Okeanator (sem er Húsvíkingur undir öðru nafni), Náttfari RE, Pétur Jónsson RE, Ontika og Reval Viking. 

Eftirminnilegast gæti vel verið Gísli Árni RE 375, sem var frægt aflaskip á þeim tíma með frábærri áhöfn.

Eftirminnilegasti skipstjóri sem þú hefur siglt með?

Það er líklega Eggert Gíslason frá Kothúsum í Garði en ég byrjaði með honum á Gísla Árna RE 375 þegar ég var bara 13 ára.

Hver er skemmtilegasti maður sem þú hefur verið með á sjó?

Það er vart á nokkurn hallað þegar ég nefni Trausta Friðfinnsson frá Valbergi á Húsavík. Þvílíkur eðalsnillingur sem sá maður er, en hann var í áratugi háseti á Sigurði RE en síðar VE.

Hver er besti sjómaður sem þú hefur haft í þinni áhöfn?

Hef verið svo lánsamur að hafa úrval sjómanna í mínum áhöfnum og vart hægt að velja á milli. Nefni samt Heiðar Sigvaldason úr Kelduhverfi, sem var með mér á Feng og Árna á Bakka og líka Bjarka Helgason, Héðinssonar, Maríussonar og þeirra bræðra frá Húsavík. Alveg magnaðir báðir en hefði getað nefnt marga aðra.

 

Hver er uppáhalds fiskurinn þinn að;

-a- borða? Þorskur.

-b- veiða? Rækja (sem samt er krabbategund).

 

Hvernig finnst þér best að matreiða fisk?

Léttsteiktan á pönnu.

Hver er furðulegasti fiskurinn sem þú hefur veitt?

Sverðfiskur.

  Uppáhalds mið og af hverju?

Sprengjuholan NV af Diskó eyju við vestur Grænland en þar hittum við á ævintýralega veiði strax á fyrsta degi þegar ég kastaði trolli þar fyrst. 

 

Versta veðrið sem þú hefur lent í á sjó? 

Við lentum stundum í svakalegum veðrum og mikilli ölduhæð á Flæmska Hattinum og ekki síður á leiðinni þaðan í land. Það mátti stundum ekki miklu muna þar og heppni að ekki fór verr. Svo er veðurlag við austur Grænland engu líkt og stundum var eina ráðið að koma sér inn í ísinn til að forðast brotsjóina.

 

Hefurðu upplifað ótvíræða lífshættu á sjó?

Það er matsatriði.

 

Eftirminnileg atvik, eitt eða fleiri?

Það gleymist seint þegar norska strandgæslan tók upp á þeim ósköpum að skjóta á okkur þegar ég var á Hágangi II.

 

 

Hver er mesta breyting siglingatækja sem þú hefur upplifað?

Það var algjör bylting að fá AIS og svo er breytingin frá pappírsplotterum yfir í rafræn sjókort þar sem maður siglir á skjánum í rauntíma alveg stórkostleg.

 

Hvað finnst þér um kvótakerfið og hvernig það hefur virkað?

Held að það hafi virkað alveg þokkalega en hluti þeirra sem áttu kvótana í upphafi sýndu ekki nægilega mikla samfélagslega ábyrgð og þess vegna eru sum landsvæði í vandræðum.

 

Hvernig finnst þér fiskifræðin hafa staðið sig við að meta veiðiþol stofna?

Höfum ekkert betra til að meta veiðiþol en held að fiskifræðin sé samt mjög langt á eftir og hafi allt of lítið þróast og bætt sig. Held að fiskifræðingar viti mjög mikið á afmörkuðum sviðum en eigi langt í land með að sjá heildarmyndina.

Hvað áhrif telur þú að hlýnun jarðar muni hafa á fiskistofna við Ísland í framtíðinni?

 Það er erfitt að spá í það en líklegt að okkar helstu stofnar færi sig norðar og jafnvel út úr íslenskri lögsögu. En kannski kemur eitthvað í staðinn.

 

Hefur þér tekist að vekja áhuga afkomendanna (ef einhverjir eru) á sjómennsku?

Já, heldur betur en hvort sjómennska verður þeirra ævistarf er annað mál og frekar ólíklegt mundi ég segja. Ég á fjórar dætur sem allar hafa verið með mér í allskonar sjóvolki og ekki ólíklegt að það gæti skilað sér í því að þær starfi við sjávarútveg í framtíðinni.

 

Mundir þú mæla með sjómennsku eða skipstjórn sem góðum starfsvettvangi við ungt fólk í dag?

1. Já, alveg hiklaust.

 

Og að lokum fyrir bókaorma, áttu þér uppáhaldsbók og hvaða bók ertu að lesa núna?

Uppáhaldsbókin mín er Fjallamenn eftir Guðmund Einarsson frá Miðdal. Las hana fyrst fyrir um 30 árum og margoft lesið aftur. En svo gæti ég líka nefnt Sjálfstætt fólk eftir Laxness, sem líka er í uppáhaldi.

Núna er ég að lesa „En af os“ eftir Asne Seierstad á frummálinu, norsku, en áður hef ég lesið íslenska þýðingu Sveins H. Guðmarssonar á bókinni. Hef líka séð myndina sem fjallar um voðaverkin í Útey og er að reyna að skilja hvernig svona illmenni eins og Anders Bering verður til og hvernig samfélag býr hann til, en er litlu nær.