|
2965 Bárður SH 81 mynd Guðmundur St Valdimarsson 2019
Hinn nýi Bárður SH 81 kom til landsins í morgun en hann lagðist að bryggju í Hafnarfirði á tíunda tímanum. Guðmundur St. Valdimarsson tók á móti honum með myndavélinni og sendi þessar myndir til síðunnar.
Bárður SH 81 var smíðaður í Bredgaard bátasmiðjunni í Rødby í Danmörku og er smíðanúmer 35 hjá stöðinni. Báturinn hafði viðdvöl í Þórshöfn í Færeyjum á heimleiðinni.
Báturinn er smíðaður fyrir Pétur Pétursson skipstjóra og útgerðarmann á Arnarstapa á Snæfellsnesi. Hann mun leysa af hólmi Víkingbát með sama nafni sem er 30 bt. að stærð.
Bárður SH 81 er 26,90 metra langur og 7 metra breiður og þar með stærsti trefjaplastbátur sem smíðaður hefur verið fyrir íslenska útgerð. Báturinner útbúinn til netaveiða, en auk þess er hann með búnað til dragnótaveiða. Hann mun geta borið 55 tonna afla í körum.
Í Hafnarfirði mun m.a verða sett í bátinn netaspil og krapakerfi en búist er við að Bárður SH 81 komi til heimahafnar í Ólafsvík um miðjan desember.
Myndir Guðmundur ST Valdimarsson
Teksti www.skipamyndir.com
|
