 |
| 1868. Helga Maria RE 1 Mynd þorgeir Baldursson 2021 |
Isfisktogarinn Helga María Re1 fer frá Reykjavík í kvöld en togarinn hefur að undanförnu verið að veiðum á Vestfjarðamiðum. Á heimasíðu Brims segir frá því að nokkur undanfarin sumur hafa ísfisktogarar fyrirtækisins orðið að leita austur á Norðurlandsmið vegna aflabrests á Vestfjarðamiðum, en í ár virðast miðin ætla að gefa þokkalegan afla.
Friðleifur Einarsson er skipstjóri á Helgu Maríu en Einar Bjarni Einarsson var með skipið í nýafstaðinni veiðiferð. Friðleifur segist sammála Eiríki Jónssyni, skipstjóra á Akurey AK, um að fiskurinn væri núna á grunnslóðinni en ekki úti í kanti eða á Halanum eins og undanfarin ár.
„Það er aflinn á grunnslóðinni sem heldur veiðinni uppi. Aflinn hefur verið í góðu lagi en ef maður hættir sér of djúpt er alls staðar gullkarfi sem við megum helst ekki veiða. Við erum því á flótta undan karfa þessa dagana og svo þvælist ýsan einnig fyrir okkur, þótt það kveði ekki eins rammt af ýsugengdinni og í vor og byrjun sumars,” segir Friðleifur enn hann segir það kost að þurfa ekki að fara langt austur eftir aflanum.
„Við höfum ekki farið lengra austur en í Nesdjúpið til að ná í aflann,” segir hann.
