Viðar ÞH 17

Báturinn, sem er 36,00 brl. stór, var byggður á Akureyri árið 1974 af Bátaverkstæði Gunnlaugs og Trausta sf., Akureyri.
Um lífssiglingu hans má lesa i kaflanum
"a. Bátaverkstæði Gunnlaugs og Trausta sf., Akureyri".

Norðursigling ehf. keypti bátinn 2009 og fyrir honum lágu umfangsmiklar breytingar.

Endurgerð bátsins hófst með slipptöku á Húsavík þar sem hvalbakur, sem á hann var kominn, var fjarlægður og báturinn búinn undir 10 daga siglingu til Danmerkur.

Siglt var til skipasmíðastöðvarinnar Christian Jonsson í Engernsund þar sem bátnum var breytt í tveggja mastra skonnortu með bugspjóti. Flatarmál segla er 250 fermetrar.

Að lýsa þessari endurgerð er nánast ógjörningur en nærtækast er að segja að allt ofan og neðan þilfars hafi verið smíðað nýtt en aðeins skrokkur og þilfar hafi verið látið óhreift að mestum hluta.

Til gamans má þó geta þess að allt kalfatt í bátsskrokknum var endurnýjað og tók sú vinna sjö karla tvær til þrjár vikur. Höfðu þessir menn orð á hversu vel báturinn væri smíðaður, sterkbyggður og tæki vel við höggum.
Góður vitnisburður um Íslenska skipasmíði þar sem þessir menn þekktu vel til sterkbyggðra Norðursjávarbáta.

Til landsins kom Hildur aftur 16. júlí 2010 og sigldi þöndum seglum inn Skjálfandaflóann í fylgd annarra báta fyrirtækisins.

Báturinn gerði ekki langan stans á Húsavík því að honum var siglt í skoðunarferð til Grænlands þá þegar um sumarið. Myndband af ferðinni er á heimasíðu Norðursiglingar ehf. 
Síðan þessi skoðunarferð var farin hafa Grænlandsiglingar verið stundaðar ár hvert og þar hefur skonnortan dvalið þar sumarlangt sumar eftir sumar og hlotið einróma lof þeirra sem um borð hafa dvalið.

Vegna glæsileika hefur skonnortan Hildur ekki sloppið undan vökulum augum myndavélanna.

Óhætt er að fullyrða að fjöldi mynda af skipinu spanni þúsundir ef ekki tugþúsundir.

Engin leið er fær til að birta allan þennan myndaskara en eins mörgum er þrykkt hér inn svo sem pláss leyfir.

Myndir sem merktar eru "Skonnortan Hildur Ex Múli ÓF-5" eru teknar á siglingu skonnortunnar frá Íslandi til Tromsö í Noregi um 700 sjómílur ANA af Íslandi.

Í Noregi er fyrirhugað strandhögg til notkunar á skonnortunni yfir vetrarmánuðina þá ís hylur sjávarflötin við Grænland.

Á ekkert fley er hallað þó að fullyrt sé að skonnortan Hildur sé glæsilegasti farkostur Íslendinga í dag  
Upplýsingar um heiti báts frá upphafi:    (1354)

Frá árinu 1974 hét báturinn Múli ÓF-5, Ólafsfirði.

Frá árinu 1979 hét hann Fiskanes NS-37, Vopnafirði.

Frá árinu 1981 hét hann Faxavík GK-727, Grindavík. 

Frá árinu 1987 hét hann Faxavík GK-737, Grindavík.

Frá árinu 1988 hét hann Harpa II GK-101, Grindavík.

Frá árinu 1989 hét hann Skálavík SH-208, Ólafsvík.

Frá árinu 1999 hét hann Guðbjörg Ósk VE-151, Vestmannaeyjum.

Frá árinu 2001 hét hann Guðbjörg Ósk SH-251, Ólafsvík.

Frá árinu 2001 hét hann Viðar ÞH-17, Raufarhöfn.

Frá árinu 2002 hét hann Viðar ÞH-17, Kópaskeri.

Frá árinu 2006 hét hann Héðinn Magnússon ÞH-17, Kópaskeri. 

Frá árinu 2007 hét hann Héðinn Magnússon HF-28, Hafnarfirði.

Frá árinu 2007 hét hann Héðinn HF-28 Hafnarfirði.

Frá árinu 2009 hefur báturinn heitið Hildur ÞH. Húsavík.