 |
Frá vinnu við Héðinsfjarðargöng
|
Ekkert hefur verið grafið í Héðinsfjarðargöngum, Ólafsfjarðarmegin, í um vikutíma vegna vatnsleka í göngunum.
Magnús Jónsson, verkefnastjóri hjá Háfelli, segir að ekki hafi verið búist við vatnsuppsprettu á þessum stað; frekar hafi verið búist við þessu þegar komið væri lengra inn í bergið. Því hafi starfsmenn ekki verið búnir undir vatnslekann. Vatnsmagnið nemur um 1.500 lítrum á mínútu sem er mun minna en í Vestfjarðagöngunum, segir Magnús, en of mikið til að taka við því inni í göngunum. Því er unnið að því að veita vatninu út og þétta bergið.
Magnús segir þetta þó ekki tefja verkið; reiknað hafi verið með nokkrum slíkum stoppum í verkáætlun. Göngin eru nú orðin samanlagt um 2,5 kílómetri að lengd sem er um 1/5 af heildarlengd ganganna en byrjað var að grafa síðasta haust. Grafið er á tveimur stöðum, það er frá Siglufirði og frá Ólafsfirði í átt að Héðinsfirði. Verkinu á að ljúka í árslok 2009.Heimild www.ruv.is
