Hermann Ólafsson, framkvæmdastjóri Stakkavíkur kallar kröfur um að fyrirtækið losi sig við kvóta hryðjuverk af hendi stjórnvalda í samtali við Aflafréttir.
Stakkavík er stærsta fyrirtæki landsins sem gerir út báta í króaaflamarkinu og hefur verið með meiri kvóta en lög gera ráð fyrir.
Samkvæmt grein Aflafrétta var fyrirtækið t.a.m. með 7,3 prósent kvótans í Krókaaflamarkinu árið 2015.
Segir Hermann tvennt í stöðunni, annars vegar að stofna annað félag um rekstur á einhverjum báti og komast þannig undir kvótaþakið eða að selja frá sér bát.
Báturinn Óli á Stað GK hefur því verið settur í sölu.
Á fundi bæjarstjórnar Grindavíkur kom fram að bæjarráð legði til að bærinn nýtti ekki forskaupsrétt af skipinu og tilheyrandi aflaheimildum.
„Að mati bæjarráðs eru of margir óvissuþættir í málinu og áhætta sveitarfélagsins of mikil.
Stakkavík ehf. hyggst fjárfesta í öðru skipi og aflaheimildum í aflamarkskerfinu til að mæta þeirri minnkun sem salan hefur í för með sér.
Gangi áætlanir Stakkavíkur eftir hefur breytingin ekki afgerandi áhrif á atvinnulíf og samfélag í Grindavík,
og því ekki ástæða til að sveitarfélagið grípi inn í viðskiptin með því að beita forkaupsrétti,“ segir í fundargerð.
Segja Aflafréttir líklegast að báturinn fari til Loðnuvinnslunnar á Fáskrúðsfirði en greinilegt sé að Hermann sé síður en svo sáttur við þær skorður sem fyrirtækinu eru settar.
Stakkavík ehf á fyrir tvo báta í Aflamarkinu Gulltopp GK og Kristbjörgu HF og er þá stefnan á að auka hlutdeild í aflamarkinu.
Frétt af mbl.is af vef Aflafretta
myndir Þorgeir Baldursson
